متشتريش النوت 7

لو عندك Redmi Note 5  وعايز تبيع وتجيب Redmi Note 7 اسمحلي اقولك انت كده بتحرق فلوس عالفاضي.
هقولك ليه.
🔴 النوت 7 صحيح المعالج عليه سناب 660 بس مش هيفرق معاك بشكل كبير في الاداء عن سناب 636 الموجود علي النوت 5. فكر وصحصح معايا يللي ناوي تبيع وتجيب النوت 7.
النوت 7 بنفس معمارية معالج النوت 5 وبنفس النانوميتر 14 مزوديلك شويه تردد المعالج وحطيلك معالج رسوم ادرينو 512 كل ده علشان تلعب PUBG على HD ده اخر طموحاتك ههههه سبني كده اكركر واضحك شويتين 😄😄😄.
مهو انت كده كده ممكن برضه هتلعب PUBG على النوت 5 لما تثبت برنامج Gfx tool او اي برنامج من النوع ده.
كده انا استفدت ايه لما جبت النوت 7 بصوت مرتضي منصور 😄.
🔴 ‌هتقولي الكميرا ال 48 ميجابكسل وكمية التطبيل عليها هقولك هات كميرا النوت 5 وتعال نعمل مقارنة مابينهم هتلاقيهم متشابهين كتير في التفاصيل عدي ان النوت 7 بيديلك شويه تفاصيل افضل في الليل ولو انت فتحت البوتلودر ونزلت كميرا جوجل علي النوت 5 هتديلك اداء مهول وجاحد في التصوير  👍.
🔴 ‌هتقولي خامة التصنيع افضل في النوت 7 هقولك النوت 5 خامة تصنيع معدني مش زي النوت 7 بلاستك وحطيلك عليه قزاز.
🔴 ‌هقوللي شاشة النوت 7 احلي هقولك شاشة النوت 5 كامله مفيهاش اي قطع او نوتش رخم والاشعارات هتلاقيها ثابته اعلي الشاشة واسأل اللي عنده نوتش وايه حكايته مع الاشعارات هههههه لا بلاش انت كده هتستفزه بالموضوع ده 😄.
🔴 ‌طب قصر الكلام هيجي حد ويقولي ايه الرغي ده يعني انت تقول النوت 7 مش كويس وعامل نفسك انت الفاهم هقوله لا يعم مش المسألة اني فاهم بس كده اكلمك بالعقل لو معاك النوت 5 مش هيستاهل تجيب النوت 7 وانصحك تستني لحد النوت 8 لانه ممكن هيجي بمعالج سناب 710 او اعلي وتبقي انت الكسبان او انت تحوش قرشين زيادة وتجيب البوكوفون وتكسب موبايل بمعالج فئة عليا محترم.

شارك هذا المنشور